1Jo 3 | NVM | STEP | Regavo ni Asoinuvuon iji fu izeg no oijmuinma iji gaf! Fu no oijmuinma iji fuka ma bomana ijefuon noiji fu kuo, Jaiji ja afnuno kuin. Regavo iji fuka ma noiji noka ma Godon afijaf. Regavo e iji moikigia ise reoijo iji bu God buba mukoi vierafenva ijefuon noiji no afijaf ijeg buba mukoi vierafen.

1 John 3

No Godon afijaf igeg karikfuon ijin

1 Regavo ni Asoinuvuon iji fu izeg no oijmuinma iji gaf! Fu no oijmuinma iji fuka ma bomana ijefuon noiji fu kuo, Jaiji ja afnuno kuin. Regavo iji fuka ma noiji noka ma Godon afijaf. Regavo e iji moikigia ise reoijo iji bu God buba mukoi vierafenva ijefuon noiji no afijaf ijeg buba mukoi vierafen. 2 Ijefuon e kaifnun ma igie noiji non iviakma Godon afijaf redo rad no ar fu fino ijia vakva nokafu e izekin rekfuon iji noba mukoi vierafen. Regavo no vierafega Jesu* fu una ruakma vajai nuvuon iji fu una fuon ijegrega no gak ijefuon maiji Jesu no ni nuvuon ijia gak. 3 Regavo erar fu ma vierafero Jesu fu una ruakrenoro fu ijeg vierafekma e iji fuka Jesu fu ma ijesugin reoinon fu ijeg reok.

4 Erar fu ise kafo reoino iji fu Godon vierafe ijia jaoino bakin. Regavo madu fu Godon akaij iji fu agoimo bakin ijefuon fu tavan bog Godon akaij iji abe tuasem. 5 Regavo jan vierafe Jesu fu ruainma iji fu e iji ise reoijo ijiebuon ise iji abe vakafa ruain. Regavo fuiji fu ise kafo reoinma bakin. 6 Regavo erar fu Jesuk tavan bog fivakma fuba una ise reunaik. Revo erar fu ise fu reoinon iji fuba aremo iji fu Jesu fuba gain vo fu fusik tavan bog fioino bakin.

7 Afnun igi ni koikjo mukoi samuanamiknum of. Regavo jab arega e ise kafob aferdia una unam ise ijia vak. Regavo erar fu unam ma ijia kegokma fuiji fuka Jesu fu maturainma ijeg maturaik. 8 Regavo erar fu ise reoinon iji fuka Setanon* e ijefuon maiji Setan fu ik anej ijia fu ise rene ruain. Regavo Godon Farif iji fu irerafuon moikigia ari ruainma iji fu Setanon ik iji dab tuase gareg akozekafa ruain.

9 Regavo erar fu Godon am rekma ise fuon fu reoinon iji fuba una rek. Ijefuon maiji God fu kaven iviamkor abe e iji main. Regavo God fun e ijefuon Asoi renmado e iji fuba una ise reok. 10 Regavo izeg no Godon afijaf iji no kafo giakgavo Setanon afijaf iji no kafo giakva unam iji ijeg. Erar fu unam ma iji fu kegoino bakin vo madu kaifijaf fuba mukoi oijmiamo e iji fu Godon am bakin. E iji fu Setanon am ijar ijeg reoin.

Vuak oijmanamivo ijin

11 Vuak iji ik anej ijia ja fainva iji igin noka kaifnuvuon na oijmanamik. 12 Regavo no e Kein fu kenma ijeg noba rek. Fuiji fu Setanon e ijefuon fu uviaifuon kanama fu guain. Regavo Kein fu irerafuon uviaifuon kanama fu guain? Ijefuon maiji Kein fu unam fuon fu reoinon iji fuka ma ise revo uviaifuon fuka unam ma ijesugin reoga fu iji kanama fu guain.

13 Ijefuon uviaifnun igie e moikigia ise reoijo ijieb ja ziegafiakva jab uri oiserdiak. 14 No kaifnuvuon oijmiavo ijefuon no vierafega no unam ise iji bu no aferduo zuarunam vakfuon iji non areme una unam ma karivako ijia ruain. Regavo erar fuba kaifijaf mukoi oijmiakma fuiji fu vek unam ise ijia oin. 15 Regavo erar fu kaifijaf ziegafiamo iji fu e kaniamoino ijekin revo e iji e kaniamoijo iji bu unam ma karivako iji buba gain.

16 Jesu fu nuvuifuon guainma ijia no izeg fu no oijmuinma iji non gain. Ijefuon no madu God fu vierafe noka uri kaifnuvuon ijiebuon aoikva fuka marek. 17 Regavo e be fu sinuom uruvana kege oknum kuai fu God mukoi oijmamo kuain. Regavo fuba kaifuon be isema oinon iji ifejdakma iji fuka ba God mukoi oijmam revo fuka kufuimen. 18 Ijefuon afnun igie noba ir igia kuai no kaifnuvuon no mukoi oijmiavo kuaik. Regavo nika uri unam ma ijia mukorigia kegoknum vo oijon ijekma mukorigia e ifejdiak.

Godon afijaf iji buba fu juvknum okfuon ijin

19 No e kaifnuvuon iji no mukorigia ijeg ifejdiaknum oijmiakva na vierafe noka Jesu Kuraison* diak makai iji jame reoij. Regavo no ijegrekva noka Godon nifak ijia oimarknum ok revo noba fu game juk. 20 Regavo no oinuvuon ijia vierafega unam no kegoijo iji fu ise ga God fuk fu vierafe unam iji fuka ma ise. Ijefuon maiji irerag fok no reoijo iji fun guome vierafen. 21 Ijefuon efnun maigie ja vierafega jafak ire ise kafo bakma jaka giriesame Godon nifak ijia vakfuon. 22 Regavo irerag no kuaga fu vajuomo ijefuon maiji no vuak fuon mukoi igaknum irerag no reoijo iji fuka oimarmo ijefuon fu ijeg ren. 23 Regavo vuak iji God fu no kuinma iji ijeg. Fu kuo nika Farinun iji ma vierafe vo izeg Jesu fu kuardiainma ijeg kaifjon mukoi oijmiafno kuin. 24 Regavo erar fu Godon vuak iji mukorigia faime igakma e iji fu tavan bog Godk oke God fu fusik ok. God fun Kaven fuon kege no uniafduin ijefuon noka ma vierafega God fu tavan bog nona oin.